Несовесни дивееле околу споменикот “12 Ваташки младинци”

Засега непознати и очигледни несовесни граѓани дивееле околу споменикот “12 Ваташки младинци”.На лице место видливи се уништувања на просторот кој неодамна беше целосно хортикултурно уреден. -Уште еднаш апелираме до граѓаните да пријават до надлежните служби, доколку забележат дека некој ја уништува околината, за која сите ние треба заеднички да се грижиме, рече попладнево градоначалникот Митко Јанчев. Тој нагласи дека имаат уште еден проект за доуредување на околината на спомен обележјето, кое е подигнато во чест на стреланите младинци во минатото. Додаде дека ваквите постапки нема да ги поколебаат во напорите за поубаво Кавадарци. Ова не е прв пат, несовесни вака да се однесуваат со јавните површини во Кавадарци. Ако сега некој со возило се движел низ тревата околу споменикот, неодамна траги од возило исто така беа видливи и во тревникот кај новиот кружен тек во градот. Реагираа од Јавното претпријатие “Комуналец”, еколошкото друштво “Еко-живот”, но и граѓани кои се револтирани од несоодветното однесување на поединци. Побараа надлежните да преземат мерки, против оние кои вандалски се однесуваат.