Граѓаните на Демир Капија се подготвуваат за прослава на големиот христијански празник „Голема Света Богородица“. На овој верски празник на 27 и 28 август од памтивек во Демир Капија се одржува традиционалниот панаѓур кој го посетуваат голем број трговци,занаетчии, угостители и земјоделци.Купувачи се демиркапијци но и гостите кои ќе престојуваат. Два дена улиците ќе бидат претесни од луге кои ќе се движат и ќе ги посетуваат изложените разновидни производи поставени на тезги од двете страни на главната улица во должина од над 500 метри. И угостителите засилено се подготвуваат да привлечат што повеќе гости. За одбележувањето на овој христијански празник ангажиран и Советот на општината .На 10 –ти овој месец започна одржувањето на традиционалниот турнир во мал фудбал.Се натпреваруваат спортисти од повеќе општини од нашава земја. На 27 август ќе се одиграат полуфиналниот и финалниот натпревар и на победничките екипи ќе им бидат доделени наградите. Прославата на овој празник ќе продолжи на 28 август со посета на црквата Света Богородица.Свештеникот за верниците ќе отслужи света божествена литургија. Два дена колку што ќе трае традиционалниот Демиркаписки панаѓур, гостите своето слободно време можат да го искористат за посета на музејот, живописната Демиркаписка клисура,винарските визби и повеќе знаменити места.