Пожар зафатил стара куќа попладнево во кавадаречкото село Бегниште, повредени нема.

Илчо Богевски, командир на Територијалната противпожарна единица од Кавадарци информираше дека со тројца пожарникари и две противпожарни возила успеале да спречат огнот да се прошири на околните објекти во селото. -Морам да нагласам дека до куќата имаше акробатски пристап, така што многу тешко дојдовме до неа. Поради непристапноста, во еден момент дури едното возило заглави кога се истрани од патот, па за да се реши проблемот, мораше да се влече со два трактора од селото, соопшти Богевски. Тој упати апел за внимателност, особено вечерва кога ќе се палат коледарски огнови.