Се градат три улици, инфраструктурно се уредува урбаната индустриска зона осум во Неготино, каде фунционираат неколку стопански субјекти. Станува збор за потегот од десната страна на излезот од Неготино кон Кавадарци, каде се лоцирани и функционираат повеќе објекти од стопанството.

Како што информираше денеска за МИА неготинскиот градоначалник Ванчо Апостолов, општината најпрвин обезбедила проектна документација, врз основа на која и биле беа одобрени два проекта.

Едниот проект е за изградба на две улици, преку Биро за регионален развој и министерствата за локална самоуправа и транспорт и врски, со посредство на Вардарски плански регион, вреден околу пет милиони денари.

Со нивното завршување, ќе следува изградбата на третата улица, со средства од околу 700 илјади евра од Министерството за транспорт и врски, преку Европската инвестициска банка.

- Најпрвин со средства од 27 милиони денари ќе се изгради целата водоводна мрежа, како и фекална и атмосферската канализација во овој дел на градот. Со тоа, овде ќе се создадат сите услови за нормално стопанисување. Сметам дека со адаптација на овој простор, ќе обезбедиме еден подобар пристап, како за граѓаните, така и за стопанствениците. Многу подобро ќе функционираат малите претпријатија кои се сместени овде, нагласи Апостолов.

Две од улиците ќе бидат пробиени и тампонирани, а една пробиена, тампонирана и комплетно асфалтирана.

Се очекува работите на терен да завршат во рок од четири месеци.