Во сенка на големиот успех на ракометниот клуб Вардар, ракометарите на ракометниот клуб Тиквеш од генерацијата 2002/2003 ја освоија мини лигата на ракометниот клуб Металург и уште еднаш потврдија дека Кавадарци е вистински расадник за млади таленти.
На завршниот фајнл фор во лигата кој се одигра вчера во Скопје, избраниците на Ќире Василев во полуфиналето демонстираа надмоќност над тимот на Макстил, совладувајќи го со 29-15, во меч во кој уште по првото полувреме тимот на Тиквеш имаше позитива од 10 гола. Во истиот стил младите кавадарчани продолжија и во финалето, недозволувајќи му на тимот на Торо Спорт да се понадева на нешто повеќе од чесен пораз, совладувајќи ги со 13-21.
Со двата триумфи во последните два натпревари ракометарите на Тиквеш ја потврдија перфектната сезона во која без пораз стигнаа до шампионскиот наслов. Покрај екипното признание, Тиквеш го има и новиот македонски ракометен бисер и најдобар млад играч на првенството во името на Мартин Петров.